Eusko Jaurlaritzaren Kontseiluak Lurralde Plangintza, Etxebizitza eta Garraioetako sailburuaren agindua baimendu du astearte honetan, 2024an Euskadiko salgaien eta bidaiarien errepideko garraio publikoan teknologia berrien eta segurtasunaren sistemak ezartzeko laguntzen deialdi berrirako. Aurrekontu-partida 70.000 euro murriztu da 2023ko aginduarekin alderatuta.
Laguntza-programaren lehenengo deialdia 2005ean egin zen, eta mugikortasun iraunkorrean aurrera egitea du helburu, sektorea modernizatzen lagunduz. Horien helburua flotak kudeatzeko, lokalizatzeko eta kontrolatzeko sistemak ezartzea da (GPS gailuen edo antzekoen bidez), bai eta salgaien eta bidaiarien garraio publikorako ibilgailuetan segurtasun-elementuak instalatzea ere. Horretarako, inbertsioak ordainduko dira, besteak beste, antitijera-sistemetan, istripu-erregistratzaileetan, kameretan, talkak arintzeko teknologietan (sentsoreak eta radarrak), suteak detektatzeko eta itzaltzeko sistemetan eta beste batzuetan, hala nola larrialdiko deietan edo gidatzearen optimizazioan. Laguntzen xede dira, halaber, sektoreko enpresek erabiltzen dituzten orga jasotzaile automatikoetako segurtasun-elementuetan inbertsioak egitea, eta segurtasun-uhalak eta eusteko gailuak jartzea Euskadiko eskola-umeak eta adingabeak garraiatzeko ibilgailuetan.
Aurtengo deialdiak 110.000 euroko aurrekontua du, eta eskaerak egiteko epea bi hilabetez egongo da irekita, laguntzen agindua Euskal Herriko Agintaritzaren Aldizkarian argitaratu eta hurrengo egunetik aurrera.